गुणि बाळ असा जागसि का रे वाया? ॥ नीज रे नीज शिवराया ॥धृ॥

अपरात्रीचा प्रहर लोटला बाई ॥ तरी डोळा लागत नाही ॥

हा चालतसे चाळा एकच असला ॥ तिळ उसंत नाहि जिवाला ॥

निजवायाचा हरला सर्व उपाय ॥ जागाच तरी शिवराय ॥

चालेल जागता चटका ।

हा असाच घटका घटका ।

कुरवाळा किंवा हटका ।

का कष्टविशी तुझी सावळी काया ? ॥ नीज रे नीज शिवराया ॥1॥

ही शांत निजे बारा मावळ थेट ॥ शिवनेरी जुन्नरपेठ ॥

त्या निजल्या ना तशाच घाटाखाली ॥ कोकणच्या चवदा ताली ॥

ये भिववाया बागुल तो बघ बाळा ॥ किती बाई काळा काळा ! ॥

इकडे तो सिद्दी-जमान ।

तो तिकडे अफजुलखान ।

पलिकडे मुलुखमैदान ।

हे आले रे तुजला बाळ धराया ॥ नीज रे नीज शिवराया ॥2॥

-     गोविंदाग्रज