कुकरी

कुकरी हे नेपाळी शस्त्र असून त्याची लांबी साधारणपणे ६ इंच ते २४ इंच इतकी असते. कुकरीचे पाते रुंद व अंतर्वक्र असून धार आतल्या बाजूस असते.

कुकरीच्या पात्याचा आकार वैशिष्ट्यपूर्ण असतो. पाते मुठीजवळ अरुंद असते, पुढे विशिष्ट कोन देऊन आत वळते आणि नंतर रुंद होत टोकाकडे पुन्हा निमुळते होते. पात्यावर आतल्या बाजूस पवित्र त्रिशूळाची खूण असते. कुकरीचा वापर युद्धासाठी तसेच घरगुती कामासाठी नेपाळमध्ये मोठ्या प्रमाणावर होतो. पहिल्या व दुसऱ्या महायुद्धात कुकरीचा मोठ्या प्रमाणावर वापर झाला.

भारतीय सैन्यातील गुरखा बटालियनच्या बोधचिन्हात कुकरीचा समावेश आहे.

युद्धासाठी वापरल्या जाणाऱ्या कुकरीला “सिरोपेट” तर दैनंदिन वापरासाठी “बुधनी” म्हणतात. कुकरी बनविण्यात ‘कामी’ व ‘विश्वकर्मा’ जमाती कुशल असतात.