गंधर्वगड

वाळकोळी गावातून गड चढायला सुरुवात केल्यानंतर, आपण तासाभरात गडाच्या माथ्यावर पोहचतो. गडावर प्रवेश करताना आपणास दरवाजाचे अवशेष दिसतात. सडकेच्या उजव्या हाताला दगडी चौथर्‍यावर हनुमंताची मूर्ती आहे. येथून पुढे जाताना आपणास मार्गाच्या दुतर्फा गडावरील वस्ती दिसते. या मार्गाने आपण गावाचे दैवत चाळोबा मंदिरात येऊन पोहचतो.मंदिराजवळ एक नागशिल्प आहे. मंदिर पाहून पुढे गेल्यावर एक प्राचिन विहिर लागते. या विहिरीचे पाणी गावातील लोक वापरतात. ही विहिर पाहून आपण गडाच्या दक्षिण तटबंदीवर यायचे. ही तटबंदी फारच प्रशस्त आहे. याच तटबंदीमध्ये ३ चोरदरवाजे आढळतात. ही तटबंदी पाहून आपण पुन्हा चाळोबा मंदिरासमोर यायचे. समोर शाळा आहे शाळेचे क्रिडांगण ज्या ठिकाणी आहे, त्या ठिकाणी पूर्वी हेरेकर सावंतांच्या वाडयाचे अवशेष होते. परंतु गंधर्वगडवासियांना या अवशेषांचे ऐतिहासिक महत्व न कळल्यामुळे त्यांनी तो वाडा भुइसपाट करुन क्रिडांगण तयार केले. गडफेरीत आपणास एक बुजलेली विहिर दिसते. गडाच्या पूर्व बाजूला जुने चौथरे दिसतात.