भोरवाडीचा किल्ला

भोरवाडीतून किल्ल्याच्या डोंगराच्या पायथ्या पर्यंत जाण्यासाठी कच्चा रस्ता आहे. या रस्त्याने किल्ल्याचा डोंगर व त्यालगत असलेला छोटा डोंगर यांच्या मधील खिंडी खाली जाता येथे. येथून ५ मिनिटांची चढाई केल्यावर आपण दोन डोंगरां मधील खिंडीत पोहोचतो. खिंडीतून उजव्या बाजूच्या डोंगरावर थोडी चढाई केल्यावर कातळात खोदलेल्या लांब रुंद पायर्‍या आणि त्याच्या दरी कडील बाजूला असलेला कठडा पाहायला मिळतो. पायर्‍या चढून वर गेल्यावर तटबंदीचे दगड व कातळात खोदलेली चौकोनी छिद्र दिसतात . टेहळणी करण्यासाठी बसणार्‍या टेहळ्य़ांना आडोसा मिळावा यासाठी या छिद्रांमध्ये खांब रोऊन त्यावर छप्पर घातले जाई. याठिकाणी असलेल्या तटबंदीच्या दगडांना बर्‍याच ठिकाणी शेंदूराचे पट्टे ओढलेले पाहायला मिळतात.

कातळातील पायर्‍या चढून वर आल्यावर गडमाथ्यावर जाण्यासाठी मातीत खोदलेल्या पायर्‍या दिसतात. पायर्‍या सुरु होतात त्या ठिकाणी उजव्या बाजूला दरीच्या टोकाकडे पाण्याचे एक लांब रुंद टाक आहे, पण माती पडून ते पूर्णपणे बुजलेले आहे. हे टाक पाहून थोड्या पायर्‍या चढल्यावर डाव्या बाजूला एक पायवाट दरीच्या दिशेला गेलेली दिसते. या पायवाटेने डोंगराला वळसा घालून ५ मिनिटे चालल्यावर पाण्याचे दोन टाकी पाहायला मिळतात. दोन्ही टाकी २६ फूट लांब , १० फूट रूंद आणि १० फ़ूट खोल आहेत. त्यातील एक टाके माती आणि गाळाने अर्धे बुजलेले आहे, दुसर्‍या टाक्यात पाणी आहे पण ते पिण्यायोग्य नाही. टाकी पाहून आल्या वाटेने परत पायर्‍यांपाशी येऊन गडमाथ्यावर जाण्यास ५ मिनिटे लागतात. गडमाथा निमुळाता आहे. त्यावर मोठे मोठे खडक आहेत. या खडकांमधून गड माथ्याच्या टोकाला गेल्यावर माऊलाई देवीचे ठाणं आहे. किल्ल्याच्या डोंगरावर चकचकीत दगड (Quartz) सापडतात. त्यापैकी काही दगड येथे पुजण्यासाठी ठेवलेले आहेत. याठिकाणी भगवा झेंडा लावलेला आहे. किल्ल्याच्या आजूबाजूला लांबलचक पसरलेले पठार असल्याने दूरवरचा प्रदेश दिसतो. किल्ल्याची उंची पायथ्या पासून १२० मीटर आहे त्यामुळे किल्ला चढायला अर्धा तास लागतो.